Svar Ágústar Einarssonar

Ágætu framhaldsnemar við Læknadeild og Líffræðiskor Háskóla Íslands.

Ég þakkar ykkur spurningar ykkar sem eru fjórar talsins og voru birtar á
Hi-starf fyrir skömmu. Svör mín fara hér á eftir.

1. Umræða um að setja beri skólagjöld á nemendur við Háskóla Íslands skýtur
upp kollinum með reglulegu millibili. Framhaldsnemar eru margir byrjaðir að
stofna fjölskyldu og koma sér þaki yfir höfuðið. Þeir eru í mörgum
tilfellum starfsmenn stofnana Háskólans og fá sumir greidd laun af styrkjum,
aðrir taka námslán, sumir taka að sér kennslu með námi en langflestir búa
þeir við viðkvæman fjárhag. Auk þess er fjármagn til verkefna oft á tíðum
ekki tryggt fyrirfram og við þekkjum dæmi þess að nemar hafi þurft að hverfa
úr námi vegna þess að styrkir hafa brugðist. Hverjar eru þínar hugmyndir um
álagningu skólagjalda á framhaldsnema?

SVAR:
Ég hafna alfarið skólagjöldum í grunnnámi og í framhaldsnámi í raunvísindum,
heilbrigðisvísindum og hugvísindum. Hófleg skólagjöld gætu þó átt við í
framhaldsnámi í félagsvísindum sem eru í innlendu samkeppnisumhverfi enda
hafa bæði Viðskipta- og hagfræðideild og Lagadeild farið fram á slíka
heimild. Skólagjöld eiga hins vegar alls ekki við í framhaldsnámi í
raunvísindum og heilbrigðisvísindum enda er framhaldsnámi þar háttað á allt
annað veg. Sama máli gegnir um framhaldsnám í hugvísindum en skólagjöld þar
eru alls ekki skynsamleg. Ég mun þvert á móti beita mér fyrir því að byggja
upp styrkjakerfi fyrir nemendur í öllu framhaldsnámi.
Skólagjöld eru að mínu mati ekki þáttur í umræðu um fjárhagsstöðu skólans
heldur er meginmálið að fá jafnmikið fjármagn til háskólastigins og varið er
til þess málaflokks á öðrum Norðurlöndum.

2. Tala framhaldsnema við Háskóla Íslands hefur margfaldast á undanförnum
árum og rannsóknir við skólann hafa aukist að sama skapi. Á hinn bóginn
hafa fjárveitingar til framhaldsnáms og bættar aðstæður til ástundunar þess
ekki fylgt þessari þróun eftir. Hvernig telur þú að megi bæta þar úr?

SVAR:
Háskólinn á framar öllu að vera rannsóknaháskóli. Í því er sérstaða hans
hérlendis fólgin auk þess sem hann er þjóðskóli, háskóli þjóðarinnar allrar.
Vitanlega þarf aukið framlag frá ríkisvaldinu í samræmi við nemendafjölda.
Ég vil auka rannsóknir, m.a. með því að Háskólinn fái meira fé beint til
rannsókna auk þess að auka fjármagn í Rannsóknasjóð. Gera á sérstakan
samning við ríkisvaldið, Reykjavíkurborg og önnur sveitarfélög um stuðning
við meistaranámið. Ég vil aðstoða akademíska starfsmenn sérstaklega við
rannsóknir, ekki hvað síst í upphafi ferils þeirra.
Ég vil að Háskólinn verði sem virkastur í opinberri rannsóknastefnu og sem
flestar rannsóknastofnanir verði á háskólasvæðinu. Rannsóknamatskerfi
Háskóla Íslands á að gilda fyrir alla háskóla hérlendis. Ég vil gera
árangurstengdan rannsóknasamning við ríkisvaldið og að unnið verði þar eftir
sérstöku reiknilíkani. Samstarf við fyrirtæki um rannsóknir verði stóraukið.
Ég vil að gerðir verði þrír fjárhagslegir samningar við ríkisvaldið,
þ.e.a.s. um kennslu í grunnnámi, um kennslu í framhaldsnámi og um
rannsóknir.

3. Til að vel takist til með framhaldsnám við hvaða háskóla sem er, er
mikilvægt að því sé sinnt af alúð og áhuga. Við Háskóla Íslands er eftirlit
með framgangi og gæðum framhaldnáms í mörgum tilfellum lítið sem ekkert og
áhugi á úrbótum lætur lítið á sér bera. Reglur hafa verið settar en
talsvert skortir á að farið sé eftir þeim. Hvernig vilt þú bæta úr þessu?

SVAR:
Unnið hefur verið að gerð gæðakerfis í framhaldsnámi í Háskóla Íslands, bæði
fyrir meistaranám og doktorsnám. Þetta gæðakerfi byggir á umræðu innan
skólans, á Háskólafundum og innan deilda, þar sem gerðar eru sömu kröfur og
til sambærilegs náms og er í nágrannalöndunum.
Ég mun beita mér fyrir góðu regluverki á þessu sviði og að farið verði eftir
því. Ég mun veita þessu máli það aðhald sem þarf til. Jafnframt er brýnt að
samræmt eftirlits- og gæðakerfi gildi fyrir allt framhaldsnám hérlendis
þannig að vandað gæða- og eftirlitskerfi í framhaldsnámi taki ekki einungis
til Háskóla Íslands heldur einnig til allra háskóla hérlendis. Það á að
ríkja jafnræði milli háskóla hérlendis í mati á gæðum, kennslu og rannsóknum
enda fjármagnar ríkisvaldið alla skólana að stórum hluta með sköttum
almennings.

4. Hvaða möguleika telur þú að Háskóli Íslands geti boðið fólki sem er
nýútskrifað úr framhaldsnámi til starfa og/eða rannsókna?

SVAR:
Ég tek undir með ykkur um mikilvægi þess að fólk geti starfað í Háskóla
Íslands við rannsóknir eftir framhaldsnám. Hinn nýi doktorsnámssjóður
Háskólasjóðs Eimskips mun styrkja framhaldsnámið verulega og mikilvægt er að
fleiri komi í kjölfarið með þannig fjárframlög. Rannís er að byggja um
stoðkerfi fyrir þá sem hafa lokið framhaldsnámi og brýnt er að það verði
eflt jafnframt því að deildir fái meira fjármagn beint til að geta ráðið
fleiri unga vísindamenn. Ef Háskólinn fær meira fjármagn verður þetta hægt í
mun meira mæli en nú er.
Ég mun einnig, ef ég næ kjöri sem rektor, fara í viðræður við stjórnvöld um
að fyrirtæki fái skattaívilnanir ef þau styrkja rannsóknir og kennslu á
háskólastigi. Ég var upphafsmaður að slíkum tillögum fyrir nokkrum árum til
að efla menningu og vísindi. Slíkar skattaívilnanir eru algengar í
nágrannalöndunum og brýnt er að sama fyrirkomulag verði innleitt hérlendis.
Slíkt myndi jafnframt auðvelda ungum vísindamönnum að fá starf í
háskólaumhverfinu.

Ég leyfi mér að lokum jafnframt að vísa á heimasíðu mína vegna
rektorskosninganna en slóðin er www.agust.is/

Bestu kveðjur,

Ágúst Einarsson
======================

Svar Einars Stefánssonar

Sæll Snorri Páll,

Takk fyrir góðar spurningar um rannsóknatengda framhaldsnámið.
Ég legg megináherslu á það markmið að byggja hér upp alþjóðlega
samkeppnishæfan rannsóknaháskóla með vísindanámi sem er í fremstu röð á
alþjóðavettvangi. Rannsóknatengda framhaldsnámið er hjarta slíks skóla.

1. Hverjar eru þínar hugmyndir um álagningu skólagjalda á framhaldsnema?

Ég er alfarið á móti skólagjöldum og alveg sérstaklega í rannsóknatengda
framhaldsnáminu. Skólagjöld í rannsóknatengdu framhaldsnámi myndu leggja í
rúst þennan vaxtarbrodd HÍ.
Þessi umræða byggist á misskilningi, enda byrjaði hún út frá hugmyndum um
framhaldsnám í viðskiptafræði. Meistara- og doktorsnemar í rannsóknatengdu
framhaldsnámi eru víðast undanþegnir skólagjöldum, meira að segja í löndum
eins og Bandaríkjunum. Hvergi eru lögð skólagjöld sérstaklega á
framhaldsnám.

Íslendingar leggja helmingi minna til háskóla en Danir og Finnar. Við
eigum að jafna þann mun af skattfé en ekki með álögum á nemendur.


2. Tala framhaldsnema við HÍ hefur margfaldast á undanförnum árum og
rannsóknir við skólann hafa aukist að sama skapi. Á hinn bóginn hafa
fjárveitingar til framhaldsnáms og bættar aðstæður til ástundunar þess
ekki
fylgt þessari þróun eftir. Hvernig telur þú að megi bæta þar úr?

Fjárskortur HÍ kemur aðallega fram í litlum fjárveitingum til rannsókna.
Auknar fjárveitingar til skólans hljóta að koma fyrst og fremst
rannsóknastarfseminni og rannsóknatengda náminu til góða. HÍ hefur minna
en helming þess fjár sem sambærilegir háskólar í nágrannalöndum fá.

Mikilvægasta spurningin er hvernig og á hvaða forsendum getum við sótt fé
í greipar stjórnvöldum. Besta forsendan er að Ísland þarf alþjóðlega
samkeppnishæfan rannsóknaháskóla til þess að haldast í fremstu röð þjóða
og HÍ er besti grundvöllur slíkrar stofnunar á Íslandi. Það er því
skynsamlegt fyrir íslenska þjóð að efla HÍ.

Ég vil útdeild rannsóknafé á grundvelli jafningjamats og ekki miða við
kennslufjárveitingar né nota pólítíska skiptingu milli skóla. Rannsóknafé
á að fara þangað sem það er best nýtt, ekki endilega þangað sem flestir
nemar eru í grunnnámi eða þeirra skóla sem alþingismenn elska.

Háskólasjóður Eimskips (1500 milljónir) mun bæta hag rannsóknanema
gríðarlega og markar þá braut sem við eigum að fara.

3. Til að vel takist til með framhaldsnám við hvaða háskóla sem er, er
mikilvægt að því sé sinnt af alúð og áhuga. Við Háskóla Íslands er
eftirlit
með framgangi og gæðum framhaldnáms í mörgum tilfellum lítið sem ekkert og
áhugi á úrbótum lætur lítið á sér bera. Reglur hafa verið settar en
talsvert skortir á að farið sé eftir þeim. Hvernig vilt þú bæta úr þessu?

Stjórn skólans verður að taka mið af markmiðum sínum og metnaði. Markmið
um alþjóðlega samkeppnishæfan rannsóknaháskóla krefst gæðaeftirlits, sem
tryggir að vísindanám við skólann standist alþjóðlegar kröfur og sé í
fremstu röð. Meistara- og doktorsnemar eiga að birta niðurstöður í
alþjóðlegum ritrýndum vísindatímaritum.

Ég átti þátt í að setja reglur Læknadeildar um doktorsnám fyrir 10 árum,
og leiðbeindi reyndar fyrsta doktornum sem útskrifaðist eftir þeim reglum.
Rannsóknanámsnefnd Læknadeildar heldur uppi nákvæmu og virku gæðaeftirliti
í upphafi, miðbik og lok námsins, og horfir yfir öxl doktors- og
meistaranefndanna til að halda uppi alþjóðlegum staðli. Rannsóknanám í
fremstu röð krefst rannsóknastarfsemi í heimsklassa. Þetta er spurning um
metnað.


4. Hvaða möguleika telur þú að Háskóli Íslands geti boðið fólki sem er
nýútskrifað úr framhaldsnámi til starfa og/eða rannsókna?

Til þess að HÍ geti keppt á jafnréttisgrundvelli við háskólana í
nágrannalöndunum þarf að 2-3 falda fjárveitingar til skólans og megnið af
því færi til uppbyggingar á rannsóknum og rannsóknanámi. Hluti að því er
aðstoðarmannakerfi fyrir framhaldsnema og stöður yngri vísindamanna (post-
doc.). Við eigum að fara að fyrirmynd bestu rannsóknaháskóla í heiminum og
slíkar stöður fyrir yngri vísindamenn eru lykilatriði í styrk þeirra
stofnana. Alþjóðlega samkeppnishæfur rannsóknaháskóli verður að byggjast á
sambærilegum aðstæðum, fjárhag og mannafla og bestu háskólar í okkar
heimshluta.


Ég þakka fyrir spurningarnar.

Nánari upplýsingar má fá á heimasíðu minni www.einarstefansson.is sem
opnar á morgun.

Bestu kveðjur,
Einar Stefánsson

Svar Kristínar Ingólfdóttur

Komdu sæll Snorri Páll,

Þakka þér fyrir að leggja fram spurningar um framhaldsnám við Háskóla
Íslands. Það er hárrétt sem kemur fram í inngangi þínum að framhaldsnemar
leggja jafnan drjúgan skerf til vísindastarfs í háskólum undir leiðsögn
kennara. Ég tel eitt mikilvægasta verkefni Háskóla Íslands vera að skerpa
betur á hlutverki sínu sem rannsóknarháskóli og til þess að svo megi verða
er brýnt að styrkja framhaldsnámið. Mér er því ljúft að svara spurningum
þínum.

1. Hverjar eru þínar hugmyndir um álagningu skólagjalda á framhaldsnema?

Ég tel ekki að horfa eigi til skólagjalda til að leysa fjárhagsvanda HÍ,
hvort heldur í grunn- eða framhaldsnámi. Ég tel það vera lykilatriði fyrir
íslenskt þjóðfélag að eiga sterkan þjóðskóla þar sem allir, sem hafa vilja
og getu, geti menntað sig án tillits til efnahags. Það má ekki gleymast að
nemendur leggja talsvert af mörkum fjárhagslega nú þegar til að geta stundað
háskólanám, ekki síst fjölskyldufólk. Það verður jafnframt að hafa í huga
að upptaka skólagjalda kallar á aukin útgjöld ríkisins, bæði á formi beinna
framlaga til lánasjóðs og á formi niðurgreiddra vaxta vegna endurgreiðslu.
Í löndum þar sem skólagjöld hafa verið lögð á, hefur framlag ríkisins nær
undantekningalaust lækkað og skólagjöld að sama skapi smám saman hækkað.
Það er því við því að búast að slíkt gerðist hér, og Þótt skólagjöld yrðu í
upphafi tiltölulega hófleg, óttast ég að svo yrði ekki lengi. Það er líka
rétt að hafa í huga að fjárframlag til Háskóla Íslands er miklu lægra en
framlög til sambærilegra háskóla í nágrannalöndum. Á meðan fjárframlög til
skólans eru ekki samanburðarhæf við framlög í nágrannalöndum, megum við ekki
eiga á hættu að þau lækki enn frekar. Háskóli Íslands hefur lagt mikið af
mörkum til samfélagsins fyrir tiltölulega lítið fé.


2. Tala framhaldsnema við HÍ hefur margfaldast á undanförnum árum og
rannsóknir við skólann hafa aukist að sama skapi. Á hinn bóginn hafa
fjárveitingar til framhaldsnáms og bættar aðstæður til ástundunar þess ekki
fylgt þessari þróun eftir. Hvernig telur þú að megi bæta þar úr?

Langmikilvægasta hagsmunamálið að mínu mati er að framhaldsnemar geti
stundað námið sem fulla og launaða vinnu. Þegar stefna um eflingu
framhaldsnáms við HÍ var samþykkt, var gert ráð fyrir að opinbert
fjárframlagt til rannsókna yrði jafnhátt fjárframlagi til kennslu. Þetta
hefur ekki gengið eftir, og í stað þess að hlutfallið sé 1:1, er
rannsóknaframlag nú einungis 46% af framlagi til kennslu. HÍ hefur því
framfylgt stefnu sem vissulega hefur heppnast hvað varðar fjölgun stúdenta
og árangur í rannsóknum, en fjárframlag hefur ekki fylgt eftir. Árangurinn
sem náðst hefur er tilkominn vegna áræðni og dugnaðar bæði kennara og
stúdenta, en nú er úrræða þörf án tafar því ekki verður lengra gengið á
þessari braut án þess að til komi auknir fjármunir. Það fylgir mikil ábyrgð
því fyrir leiðbeinendur að taka að sér doktorsnema, bæði faglega og
fjárhagslega. Það er alveg ljóst að óöryggi í fjármálum getur leitt til
þess að hæfir kennarar veigri sér við að taka doktorsnema.

Við verðum að kynna rannsóknir og rannsóknartengt framhaldsnám við háskólann
miklu betur. Jafnframt verðum við að sækja markvisst á fjárvetingavaldið og
sannfæra það um arðsemi þessarar starfsemi fyrir samfélagið og nauðsyn þess
að hefja nýja sókn með Háskóla Íslands í fararbroddi. Ég trúi því að það
takist.

Með hækkuðu rannsóknaframlagi getum við aukið fjárframlag til deilda vegna
framhaldsnáms og styrkt aðstöðu og fjölgað námskeiðum á framhaldsstigi.
Ennfremur yrði kleift að auka fjárveitingar til Rannsóknasjóðs HÍ, en í hann
geta leiðbeinendur sótt um launakostnað vegna framhaldsnema. Ekki má svo
gleyma nýgerðum samningi sem Páll Skúlason rektor hefur haft forgöngu um,
þ.e. að nýta megi arðgreiðslur af Háskólasjóði Eimskipafélagsins til
eflingar framhaldsnáms. Þetta er ómetanleg lyftilstöng fyrir framhaldsnám
við HÍ. Með tilkomu Háskólatorgs, sem verið er að fjármagna um þessar
mundir, mun aðstaða framhaldsnema einnig batna svo um munar.


3. Til að vel takist til með framhaldsnám við hvaða háskóla sem er, er
mikilvægt að því sé sinnt af alúð og áhuga. Við Háskóla Íslands er eftirlit
með framgangi og gæðum framhaldnáms í mörgum tilfellum lítið sem ekkert og
áhugi á úrbótum lætur lítið á sér bera. Reglur hafa verið settar en
talsvert skortir á að farið sé eftir þeim. Hvernig vilt þú bæta úr þessu?

Það er dagljóst að ef við viljum halda úti framhaldsnámi á heimsmælikvarða
verðum við að gera mjög skýrar og strangar gæðakröfur. Við þurfum að gera
kröfur til skólans, við þurfum að gera kröfur til kennara og við þurfum að
gera kröfur til nemenda. Ég tel mjög mikið í húfi og mun því beita mér af
krafti fyrir því að skólinn fylgi sínum markmiðum að þessu leyti.
Mikilvægur liður í þessu er einnig það sem ég nefndi hér að framan,
þ.e.a.s. að framhaldsnemendur geti stundað námið sem fulla vinnu. Með því
skapast nauðsynlegur agi og festa, bæði fyrir skólann og fyrir nemendur. Það
má í raun segja að samfélagið hafi ekki efni á öðru en leggja fram það fé
sem til þarf. Við erum að byggja hratt upp íslenskt þekkingarsamfélag og þar
er nauðsynlegt að setja markið hátt.


4. Hvaða möguleika telur þú að Háskóli Íslands geti boðið fólki sem er
nýútskrifað úr framhaldsnámi til starfa og/eða rannsókna?

Framsýnn háskóli verður að huga að nýliðun og ég tel víst að með batnandi
fjárhag geti Háskóli íslands ráðið fleira vel menntað fólk til starfa við
kennslu og akademískar rannsóknir. Háskólinn þarf líka að vera vakandi
fyrir möguleikum til þess að setja upp fleiri rannsóknarverkefni í tengslum
við íslenskt atvinnulíf.

Bréf til Rektorsframbjóðenda

Fyrir nokkru sendum við ásamt framhaldsnemum við Læknadeild út Bréf til Rektorsframbjóðenda. Við höfum fengið svör frá þremur af fjórum frambjóðendum.
Hér kemur bréfið:

Til frambjóðenda til rektorskjörs við Háskóla Íslands

Það er til siðs í hátíðarræðum að vísa til framhaldsnáms sem helsta vaxtarbrodds Háskóla Íslands og á heimasíðu skólans segir um framhaldsnám: “Háskóli Íslands er traustur og viðurkenndur rannsóknaháskóli í hinu alþjóðlega vísindasamfélagi. Einn helsti þáttur í starfi Háskólans er rannsóknatengt framhaldsnám til meistara og doktorsnáms”. Til marks um árangur er gjarnan tekið fram að framhaldsnemum við skólann hafi fjölgað mjög á undanförnum árum. Hinsvegar er það svo að fjölgun framhaldsnema, ein og sér, dugar ekki til viðurkenningar í hinu alþjóðlega rannsóknasamfélagi. Við alþjóðlega viðurkennda háskóla hvílir rannsóknavinna á herðum framhaldsnema sem þar stunda sitt nám undir leiðsögn prófessora skólanna. Vinnuframlag þeirra er þannig ómetanlegt öllu vísindastarfi slíkra skóla.
Framhaldsnemar hafa hingað til lítið tjáð sig um eigin málefni á opinberum vettvangi, til að bæta úr þessu æskjum við þess að frambjóðendur svari eftirfarandi spurningum hér á HI-starf og vonum að hér geti farið fram almenn umræða um stöðu framhaldsnáms við Háskóla Íslands.

1. Umræða um að setja beri skólagjöld á nemendur við Háskóla Íslands skýtur upp kollinum með reglulegu millibili. Framhaldsnemar eru margir byrjaðir að stofna fjölskyldu og koma sér þaki yfir höfuðið. Þeir eru í mörgum tilfellum starfsmenn stofnana háskólans og fá sumir greidd laun af styrkjum, aðrir taka námslán, sumir taka að sér kennslu með námi en langflestir búa þeir við viðkvæman fjárhag. Auk þess er fjármagn til verkefna oft á tíðum ekki tryggt fyrirfram og við þekkjum dæmi þess að nemar hafi þurft að hverfa úr námi vegna þess að styrkir hafa brugðist.
Hverjar eru þínar hugmyndir um álagningu skólagjalda á framhaldsnema?

2. Tala framhaldsnema við Háskóla Íslands hefur margfaldast á undanförnum árum og rannsóknir við skólann hafa aukist að sama. Á hinn bóginn hafa fjárveitingar til framhaldsnáms og bættar aðstæður til ástundunar þess ekki fylgt þessari þróun eftir. Hvernig telur þú að megi bæta þar úr?

3. Til að vel takist til með framhaldsnám við hvaða háskóla sem er, er mikilvægt að því sé sinnt af alúð og áhuga. Við Háskóla Íslands er eftirlit með framgangi og gæðum framhaldnáms í mörgum tilfellum lítið sem ekkert og áhugi á úrbótum lætur lítið á sér bera. Reglur hafa verið settar en talsvert skortir á að farið sé eftir þeim.
Hvernig vilt þú bæta úr þessu?

4. Hvaða möguleika telur þú að Háskóli Íslands geti boðið fólki sem er nýútskrifað úr framhaldsnámi til starfa og/eða rannsókna?

Virðingarfyllst,
Framhaldsnemar við Læknadeild og Líffræðiskor Háskóla Íslands.

Skorarfundir

Verð nú að játa það að það er frekar lítið skrifað á þessa síðu og vona ég að umræðan fari að glæðast. Kem nú til með að bæta úr þessu með fréttum af 3 skorarfundum. Dagskráin hefur verið annsi þétt skrifuð hjá mér seinnustu vikurnar og því hafa fréttir af fundunum borist seinnt.

Ýmis málefni hafa verið rædd á þessum fundum sem haldnir voru 25 janúar, 1 og 15 febrúar. Hæst hefur þar borið breytingar á grunnnáminu, ýmis mál sem tengjast starfsemi skorar og námskynning sem haldin verður 27 febrúar.

Vil svo að lokum hvetja fólk til að tjá sig hér á síðuni og koma með líflega umræðu um ýmis mál sem viðkemur framhaldsnáminu (eða ekki það skiptir engu máli bara fá smá líf í hana svo fólk nenni að skoða hana).

Kveðja Þórdís

skorarfundur og útskriftir

Gleðilegt nýtt ár og takk fyrir það gamla. Skorarfundir eru hafnir aftur eftir jólafrí og ýmis málefni sem bíða úrlausnar.

Á fundinum 18 janúar síðastliðin voru ýmis málefni til umræðu þó ekki hafi gefist tími til að ræða þau öll. Ýmis mál er tengjast skorini voru rædd ásamt nemendamálum.

Þá að málefnum sem koma skorarfundum ekkert við. Það fer að styttast í febrúarúrtskriftina og að venju eru nokkrir framhaldsnemar þar í hópnum. Endilega verið dugleg við að mæta á fyrirlestrana og kynna ykkur hvað aðrir nemar hafa verið að gera. Einnig er þetta gott tækifæri fyrir nýja framhaldsnema til að kynna sér hvernig þetta gengur fyrir sig. Verða nánari tímasetningar auglýstar síðar.

Kveðja Þórdís

skorarfundir

Þann 23 nóvember var haldin skorarfundur en af óviðráðanlegum orsökum hafa fréttir af honum ekki borist til ykkar fyrr en nú. Á þessum fundi var skipað í kennsluháttarnefnd skorar. Var Guðrún Marteinsdóttir skipuð fulltrúi skorar í Kennsluháttarnefnd deildar og Zophonías O. Jónsson varamaður hennar.

Næsti skorarfundur var 14 desember og var það seinnasti fundurinn fyrir jólafrí. Ýmis málefni voru til umræðu á þeim fundi.

Þá er þetta ekki lengra að sinni og óska ég öllum gleðilegra jóla og hittumst heil á nýju ári.

Jólakveðja Þórdís

stjórnin tekin til starfa

Ég vildi bara láta ykkur vita af því að ég er mætt frá "Draumalandinu" Ameríku og stjórnin er því tekin til starfa. Við Sirrý og Snorri Páll áttum stuttan fund í dag þar sem við fórum yfir það sem liggur mest á að gera og skiptum með okkur verkum. Við munum taka upp þráðinn á fimmtudaginn í næstu viku. Þau mál sem við erum að kíkja á núna er samstarf við önnur félög framhaldsnema í Raunvísindadeild, skólagjöld og fleiri hagsmunamál. Ef það er eitthvað sem þið viljið koma á framfæri við okkur þá er bara að koma við í 157 eða senda tölvupóst.
Kveðja,
Ólafía Lár.
Formaður Felixs
s:8987877
olafial@hi.is

Skorarfundur 9 nóvember

Á skorarfundinum 9 nóvember var haldið áfram þar sem frá var horfið í afgreiðslu námskeiða sem kennd verða á vormisseri. Vegna tímaskorts náðist ekki að klára allt og bíða því nokkur námskeið afgreiðslu.
Ekki er komin dagsetning á næsta fund og því er en nokkur bið á því að tilkynnt verði hvaða námskeið verði kennd.

Nemendamál voru einnig á dagskrá.

Kveðja Þórdís

Lesaðstaða

Okkur finnst þetta vera mjög góð hugmynd hjá ykkur Ægir og Ester :-) Það er ljóst að við erum ekki að nýta allt herbergið og hefði minna herbergi verið lausin. BS nemar eru fleiri og hafa líklega meiri not af svona aðstöðu þegar öllu er á botninn hvolft, alveg eins og við hefðum meiri not af minna herbergi. Það hefur borið á því í kjölfar lesaðstöðuumræðunnar að framhaldsnemar eru að skiptast í tvo hópa. Annar hópurinn vill alveg loka lesaðstöðunni og hinn vill hafa þetta alveg frjálst. Að undanförnu hefur borið meira á þeim síðarnefnda. Og mitt á milli lenda þeir í leiðindum sem eru að reyna að fara milliveginn og koma einhverri reglu á þetta öllum í hag. Skilaboð okkar til þessara hópa eru sú að verið er að reyna að koma til móts við öll sjónarmið. Það er engan vegin okkar vilji að vera með leiðindi við BS nema. Öll vorum við jú einusinni í sömu sporum. Ástæðan fyrir því að farið var út í þessa umræðu var sú að nokkrir Bs nemar voru búnnir að flytja búslóðina sína á laus borð í herberginu þannig að enginn annar BS nemi gat sest þar. Er þetta hagur BS nema??. Við hefðum alveg getað litið framhjá þessu og barasta leyft þeim að hertaka þessi borð þannig að enginn annar BS nemi kæmist að. Svo er það hlutur framhaldsnema í þesssu máli. Upphaflega var herbergið eingöngu ætlað framhaldsnemum. Ljóst var strax í upphafi að við myndum alls ekki mannna þessi 32 borð sem eru í herberginu og því kjörið að hleypa Bs nemum inn og leyfa þeim að njóta þeirra lausu borða sem eru þar. Um þetta voru allir sammála! Það er bara ekki hægt að líta framhjá þeirri staðreynd að Bs nám og framhaldsnám eru ólík. Flest okkar eru ekki í hópvinnu- og prófatörn og vinna okkar einkennist af feltvinnu/labbavinnu og svo lotum í skriftum og lestri. Þarfir þessara hópa eru ólíkar og erfitt að samræma þarfir allra. Okkur finnst alveg í myndinni að athuga herbergjaskipti ef að vilji er fyrir því hjá Haxa og Fjallinu. Þá gætum við fengið minna herbergi sem að við ein hefðum aðgang að og BS nemar gætu fengið öll lesplássin uppi og gert það sem þeim sýnist við þau. Leggjum við til að þetta verði athugað af stjórn Felix og samband haft við Haxa og Fjallið. Hugsanlega væri hægt að hafa lýðræðislega kosningu um þetta mál, og slíkt væri líklega besta leiðin svo að flestir séu sáttir.
Bestu kveðjur. Maja og Þórdís.

lesaðstaða - again

Við Ægir vorum að spekúlera í lesaðstöðumálum okkar framhaldsnema..
Þeir hjá byggingarnefnd hússins eru að "greina" notkun okkar á lesaðstöðu almennt.
Við erum smeyk um að niðurstaðan verði ekki okkur í hag. Erum að spá í hvort við þyrftum að skrifa bréf til nefndarinnar þar sem við skilgreinum okkar þarfir sjálf.
Tillaga hefur komið fram innan hópsins að bjóða skipti á okkar lesaðstöðu uppi á þriðju hæð fyrir nemendaherbergi á fyrstu hæð. Það herbergi er minna og meira lokað og hentar okkur líklega betur en hitt.. spurning um hvort bs nemar eru sammála??

Þyrftum eiginlega að hittast sem fyrst - áður en allt verður tekið af okkur.
HVERNIG ER ÞAÐ STJÓRN !

Ester og Ægir

Skorarfundur 26 októver

Þá er en einn skorarfundurinn liðin. Ýmis nemendamál voru rædd á fundinum auk þess sem haldið var áfram að fjalla um námskeið sem til stendur að kenna næsta vor. Þar af eru nokkur framhaldsnema námskeið.
Annars hefur verið fundað nokkuð stíft seinnustu vikur og hefur verið fundur í hverri viku að undanförnu. Nú fer hins vegar að hægjast aðeins um og er engin fundur áætlaður í næstu viku.

Kveðja Þórdís

Fréttir af lesaðstöðu

Sæl öllsömul
Eins og þið vitið flest þá fórum við Þórdís í að koma einhverju skipulagi á lesaðstöðumálin, það er að segja að setja einhverjar reglur fyrir BS nema til að fara eftir og að merkja borðin vel og vandlega. Öll borðin í aðstöðunni hafa nú númer og settum við mynd við innganginn af öllum borðum og númerum þeirra. Við hliðiná þessum lista er síðan listi yfir þá 20 framhaldsnema sem eiga borð í herberginu ásamt nafn leiðbeinanda. Jafnframt þessu þá settum við tilkynningum á hvert borð þess efnis að BS nemendum væri óheimilt að eigna sér borð og þarmeð teppa fyrir öðrum BS nemum sem hafa áhuga á að nýta sér lesherbergið. Við gáfum þeim 2 vikur (til 5.nóv) til að taka dótið sitt af borðunum, annars yrði dótið þeirra fjarlægt. Allir BS nemar eiga rétt á að lesa við þessi 12 borð sem eru laus í herberginu og alls ekki ásættanlegt að fólk sé farið að hóta handrukkaraaðferðum ef að aðrir BS nemar dirfast að setjast við borðið. Á bókasafninu á hæðinni fyrir neðan eru alls 28 lespláss, sem var mun meira en ég hefði þorað að vona. Þegar ég kíkti þangað í gærdag þá voru aðeins 2 nemendur að lesa þar í þessum 28 lesplássum. Þannig að það eru nú ekki bara við (framhaldsnemar) sem að erum ekki að fullnýta lesaðstöðuna okkar. Hafa ber þó í huga að þessi 28 lespláss á bókasafninu eru misgóð og á að deila með BS nemum landafræði. Mér hefur heyrst allir taka mjög vel í það að koma skipulagi á þetta, sumir vilja bara hreinlega harðlæsa herberginu strax og aðrir vilja deila þessu til hins ítrasta með BS nemum. Vonandi er þetta einhver millivegur. Við ætlum allaveganna að sjá til næstu 2 vikurnar og sjá hvort að BS nemarnir sem hafa hertekið borð láti ekki af slíkum fyrirætlunum og fjarlægi dótið sitt. Þvímiður eru tímarnir á Grensás liðnir, ég veit nú samt ekki hvort að það var betra. Þar var lesaðstaðan ekki svo góð og þeir sem voru ákveðnastir tóku sér borðpláss sem þeir vörðu dyggilega fyrir yngri nemendum með kjafti og klóm. En nóg um það, takk fyrir frábær viðbrögð ykkar :-)
Bestu kveðjur. Maja.

Aðalfundur-skýrsla

Góðan daginn gott fólk og takk fyrir aðalfundinn.

Eftirfarandi aðilar voru kosnir í embætti:
Ólafía Lárusdóttir formaður
Snorri Páll Davíðsson gjaldkeri
Sigríður Kristinsdóttir ritari
Halldór Pálmar Halldórsson var kosinn skoðunarmaður reikninga.

Þórdís Vilhelmína Bragadóttir var kosin til að sitja skorarfundi og Ester Rut Unnsteinsdóttir til vara.

Snædís Huld Björnsdóttir var kosinn í rannsóknarnámsnefnd og Edda Sigurdís Oddsdóttir til vara.

Ægir Þór Þórsson var kosinn fyrir hönd Felix í stjórn líffræðistofnunar.

Athygli er vakin á að heimasíðunefnd er enn að störfum, en hana skipa:
Gunnar Hallgrímsson, Hulda Sigríður Hreggviðsdóttir og Freydís Vigfúsdóttir.

Tvær minniháttar breytingar voru gerðar á lögum félagsins. En þau má nálgast á þessari slóð Lög Felix .

Samþykkt var að Edda setti fram drög að bréfi til að mótmæla hugmyndum um skólagjöld á framhaldsnám.

Fráfarandi stjórn þakkar fyrir sig...

Lesaðstaðan okkar ! Innrás !

Leaðstaðan okkar ! Innrás !
Við Þórdís löbbuðum upp í lesaðstöðuna okkar á 3 hæð (fyrir ofan bókasafnið) og sáum að fjölmargir BS nemar eru búnnir að festa sér borð þar með nafni og tilheyrandi bókum og dóti. Þegar við (framhaldsnemar) ákváðum að leyfa BS nemum að lesa þarna þá man ég ekki betur en að við gerðum það með það í huga að leyfa þeim að nota borðplássið sem ekki var í notkun af framhaldsnemum. Það er að segja að þau mættu sitja þar og lesa en ekki “festa” sér borð eins og á Grensás. Við sýndum góðfúslega lesaðstöðuleysi þeirra mikinn skilning með því að veita þeim aðgang að herberginu. En nú staðan önnur, margir eru búnnir að koma sér kyrfilega fyrir og enginn annar kemst að, hvorki framhaldsnemar né BS nemendur! Þetta var ekki markmiðið með ákvörðun okkar. Því er spurningin sú, hvað viljið þið gera í þessu máli? Því að það er nokkuð ljóst að ef ekki er neitt að gert þá verður aðstöðuleysið algert og við lendum í leiðinda harki við BS nemendur sem hafa fest sér borð. Okkur Þórdísi varð einnig ljóst að það er enginn framhaldsnemi sem að stendur vörð um lesherbergið okkar og passar að umgengni þar sé góð. Báðar viljum við að BS nemar fái að lesa þarna en alls ekki að þeir festi sér borð svo aðrir komist ekki að! Við skulum ekki gleyma því að þetta er herbergið okkar og við ráðum hvað er gert við það. Annað varðandi herbergið er það að sum borðin eru merkt og önnur ekki og þar af leiðandi ómögulegt að vita hvaða framhaldsnemi er með hvaða borð. Því verðum við að vita hver er með hvaða borð. Við gerðum mynd borðunum sem að við sendum í tölvupósti og gáfum þeim öllum númer. Gætuð þið verið svo væn að svara þessum pósti og segja okkur hvaða borð þið eruð með. Ætlunin er að búa til mynd yfir hvaða borð eru laus fyrir BS nemendur til að sitja við og hengja hana upp í lesaðstöðunni ásamt viðvörunum þess efnis að það er bannað að festa sér borð í herberginu en óhætt að lesa þar. Endilega kommenterið á þetta og komið með tillögur varðandi málið.
Bestu kveðjur.
Maja og Þórdís

Skorarfundir

Skorarfundir hafa verið haldnir nokkuð þétt undanfarið þar sem mikið er á dagskrá og því hafa verið haldnir tveir fundir síðan ég gaf seinnast skýrslu.
Á skorarfundinum 12 október var haldið áfram að kynna framhaldsnámsumsóknir og var það eina málið á dagskrá.
19 október voru fleiri atriði á dagskrá. Umræðan um framhaldsumsóknir hélt áfram þar sem frá var horfið 12 okt. Umræðan um námskeið sem kennd verða á vormisseri fór af stað auk þess sem ýmis önnur mál voru á dagskrá.

Kveðja Þórdís

Nidurstada adalfundar?

Sael oll
Eg er stodd i Maine USA til ad laera ad greina pungraekjur. Eg fretti ad eg hafi verid kosin formadur Felix. Mer list vel a thad. Vaerud einhver til i ad birta nidurstodur adalfundarins herna a vefnum?
kvedja Olafia verdandi pungraekjufraedingur

Aðalfundur !!!!!!!!!

Minni alla á aðalfundinn á morgun (föstudag) kl 1800 í Öskju.
Við verðum í einhverri af fallegu kennslustofunum.

Kv Jónas (gjaldkeri..)

Fréttir af kynningu fyrir BS nemendur

Sæl öllsömul :-)
Síðasta fimmtudag héldum við (ég, Ester, Jónas og Snædís) kynningu að loknum vinnudags fyrir BS nemendur sem að hafa áhuga á að hefja framhaldsnám. Við renndum í raun blint í sjóinn og vissum ekki hversu margir myndu koma, og yfirhöfuð að einhver kæmi. En raunin var sú að margir nemendur af 3 og 2 ári mættu, á að gíska 13-15 manns sem var mun meira en við bjuggumst við. Við höfðum harðsoðið kynningu á Power point formi sem síðar umræddir nemendur báðu um að fá til að setja á heimasíðu Haxa. Það er í athugun af okkar hálfu. Kynningin stóð yfir í eina og hálfa klukkustund og höfðu nemendur margar spurningar sem að þau höfðu ekki getað spurt kennara að. Sú umræða kom upp að mikilvægt væri að nemendur kynntu sér ólíka leiðbeinendur vel áður en að þau ákveddu að fara í nám. Við sögðum þeim að framhaldsnemar (Felix fólk) myndu örugglega aðspurðir veita grunnupplýsingar um reynslu af sínum leiðbeinanda. Og við hvöttum þau til að leita til Bjarkar til að fá upplýsingar um hvaða leiðbeinandi væri með hvaða framhaldsnema ef að þau hafa áhuga á því að freista þess að fá upplýsingar. Vonandi takið þið vel í það ef einhver BS nemandinn leitar ykkur upp í leit að upplýsingum. Í heildina tekið voru þau mjög ánægð með að fá kynningu og óskuðu eftir því að svona kynning yrði árlegur viðburður, þar sem að Haxi og Felix standa sameiginlega að svona fundi. Það er því í hendi annarra styttra kominna framhaldsnema að taka þetta að sér að ári liðnu :-)
Kveðja, Maja.

Fréttir af skorarfundum

Eins og flest allir ættu að vita núna þá lét Ester af störfum sem fulltrúi framhaldsnema í skor síðast liðið vor. Þar sem ekki var búið að auglýsa nýjan aðalfund þegar fundir hófust aftur hjá skor nú í haust þá tók Ester að sér að velja nýjan eftirmann. Tók ég að mér að sitja skorarfundi fram að næsta aðalfundi og ef engin annar lýsir yfir eldheitum áhuga á að taka að sér starfið þá er ég tilbúin að sitja fundina áfram.
Nú hafa verið haldnir þrír skorarfundir en þökk sé lélegri þekkingu minni á hotmail og bloggspot þá hafa fréttir af fundunum ekki borist ykkur fyrr en nú þökk sé góðum leiðbeiningum :)
Á fyrsta skorarfundi vetrarins 24 ágúst voru bókasafnsmálefni og nemendamál voru rædd. Síðbúnar framhaldsumsóknir voru einnig teknar fyrir. Skipað var í rannsókarnámsnefnd skorar og deildar. Guðrún Marteinsdóttir og Ólafur S. Andrésson sitja í nefnd skorar. Guðrún kemur einnig til með að sitja í rannsóknarnámsnefnd skorar og Ólafur verður varamaður hennar.
Annar skorarfundur vetrarins fór fram 14 september og var aðeins eitt mál til umræðu. Tillögur starfshóps háskólaráðs um fyrirkomulag og framkvæmd skriflegra prófa.
Á seinnasta fundi sem fram fór 5 október var byrjað að kynna umsóknir sem borist höfðu í MS og Ph.D nám við skorina. Sökum mikils fjölda þeirra kemur yfirferð þeirra til með að taka einhvern tíma og verða þær ræddar áfram á næstu fundum. Nemendamál voru einnig rædd.

Kveðja Þórdís